Coa axuda de Deus, o día 1 de agosto do 2022 D. José García Gondar cumprirá 50 anos de párroco de Carballo e D. Xosé Pumar 25 anos de servizo sacerdotal nesta Parroquia.
No ano 1997, ao cumprirse 25 anos da chegada a Carballo do equipo sacerdotal, celebramos o ANO DA PARROQUIA, como unha ocasión para:
– Mirar ao pasado, e recordar con gozo e gratitude tantas cousas como levamos feitas entre todos coa gracia do Señor.
– Vivir o presente: para facer revisión, coller novo pulo evanxelizador, e renovar a fe de cantos celebraron os Sacramentos o longo destes 25 anos, e abrir de novo as portas da Parroquia a todos, especialmente aos mozos e aos que levan tempo sen vir.
– E unha mirada ao futuro: para conseguir que a nosa Parroquia sexa unha auténtica Comunidade evanxelizadora e misioneira.
O máis salientable deste ano foi o CONCILIO PARROQUIAL, unha fermosa experiencia de comuñón eclesial na que toda a Parroquia tivo a oportunidade de facer revisión e aportar críticas, suxestións e propostas para unha mellor organización da comunidade parroquial.
“A Parroquia que temos: A Parroquia que queremos” foi o lema que enmarcou toda a temática do Concilio parroquial, que se desenvolveu nestas tres sesións: ”A Parroquia educadora da fe”, “A Parroquia que celebra a fe”, ”A Parroquia que vive a Caridade”.
Renovación dos Sacramentos, convivencias, festas das Familias…
Agora, co motivo dos 50 anos de D. José García Gondar como párroco de Carballo, o Consello Pastoral organiza o II ANO DA PARROQUIA para dar grazas ao Señor por todo o vivido durante estes 50 anos, renovar a vida cristiá das familias na postpandemia, e invitar de novo a todos: ”Vinde e entrade, volvede á Igrexa, xa que a Parroquia ten as portas abertas, onde todos poden sentirse acollidos, perdoados e invitados a participar na Eucaristía”.
O Consello Pastoral Parroquial INVITA
á Celebración de Apertura do II Ano da Parroquia, que terá lugar o próximo
domingo día 1, ás 20,00 hs
na Igrexa Parroquial
e que será presidido
polo noso arcebispo D.Julián Barrio.