O vindeiro sábado cumprirá, D.M., 96 anos. Tamén esta vez a Asociación Cultural Monte Branco, de O Couto-Cospindo, vai celebrar a data cunha homenaxe a Asunción Antelo Suárez, na casa onde ela mora, isto é, na aldea de Segufe, da parroquia de Seavia.
A galeguidade, o enxebrismo vivo e expansivo que no Couto rebule, amosará a ledicia de tal efeméride. Canto, baile, poemas, representacións que Asunción poderá disfrutar, pois conserva plenamente as súas facultades mentais. É amiga da conversa e lembra canto ten vivido na súa vida.
Fronte á súa casa, temos a Fonte da Virxe, obra das súas mans, da que hai fotografía moi coñecida feita por Xosé Manuel Casal.
Na súa habitación, ten a nosa Rexubeira unha lámina coa Virxe de Vilamaior. No seu Museo, a obra máis sobresaínte é unha composición en barro na que vemos a igrexa de Seavia, a alameda que alí había no seu arredor, e a fonte do Carme.
Asunción é moi xenerosa con Cáritas de Bergantiños. Cada semana aporta un donativo en especie, desde hai varios anos.
Quen isto escribe ten obras en barro que saíron das mans e maxín de Asunción.
A vea artística desta muller tan galardoada maniféstase no verso, na pedra, na madeira e no barro.
Ela quere ser outra Rosalía. Pero esta nosa gran escritora galega non tiña esta polifacética maneira de expresar a beleza.
Parabéns a Asunción e así mesmo a Monte Branco polo seu amor a canto temos de cultura na Terra Bergantiñá.