Preparade os camiños, achanzade as congostras, endereitade as corredoiras… clamaba o Bautista.
Os bergantiñáns, máis ca ninguén os carballeses, entenderon esas chamadas (Lucas III, 4º) como feitas na ribeira do Anllóns, puxeron man á obra e fixeron a vía romana que vai a Pharum Brigantium (A Coruña) e a Brigantium Flavium (Betanzos).
O Bautista era pariente de Xesús (Lucas I, 36) e Xesús era familiar de Santiago Cebedeo (Mateo XXVII, 56 ). Había, pois, que pregoar o Evanxeo entre nós. Por iso, Carballo fixo estrada a Compostela e así veu a devoción ao Apóstolo en Bergantiños. Así temos Santiago de Sísamo, Mens, Arteixo e moitas máis.
Ide deica o cabo do mundo (Feitos, I,8) e chegou a devoción xacobea a Muxía e Cereixo.
Hoxe o Bautista dinos: endereitade a estrada que vai a Compostela, ancheádea; liberade a autopista que vai á Coruña; rematade a autovía da Costa da Morte; mirade por esas estradas, tan estreitas e retorcidas, que van a Sísamo e a Razo.
Ofrezamos ao noso Patrón un corazón xeneroso, aberto ós demais, sen reservas. Teñamos alegría e paz no corazón porque é a festa do noso San Xoán.