Pasaron xa vintecinco anos daquela Xornada Mundial da Xuventude que tivo lugar en Santiago de Compostela. Medio millón de xóvenes de todo o mundo viñeron en peregrinación a Compostela, convocados polo papa, hoxe, San Xoán Paulo II. A cidade reviviu os mellores tempos da peregrinación, que canta o Códice Calixtino. Máis aínda, o Códice recolle todas as nacións que había en Europa naquel tempo, o século XII, que foi cando se formou a idea da unidade do continente.
“Europa fíxose peregrinando” (Goethe). “O Camiño de Santiago é a rúa maior de Europa” (X. Carlos I). Pero na X. M. X. estivo representado o mundo enteiro.
Daquel fausto de hai un cuarto de século, queda un protagonista, o arcebispo Rouco Varela, hoxe cardeal de Madrid. Desde a capital de España Rouco, como bo galego e compostelán, ten vido varias veces a Santiago en peregrinación con moito xóvenes católicos madrileños. Esta vez tamén, Rouco Varela, peregrino por antonomasia, veu cun milleiro de mozos a Santiago. Quen sabe se moitos, xa homes ou mulleres maduros, repetían peregrinación. Entre os peregrinos, Xavier Cedrón García, un mozo carballés que, dentro de tres anos, será un sacerdote para servir a Igrexa alí onde o destinen. Ogallá que a Carballo.
Benvido, unha vez máis, a Galicia e a Bergantiños o cardeal Rouco. E que por moitos anos o vexamos por acó!
“Es urgente la necesidad de contar con enviados de Cristo, mensajeros cristianos. Vosotros y vosotras, queridos jóvenes, sois enviados y mensajeros para el futuro” (Juan Pablo II en Monte del Gozo)